జూలై 7న 'ఛలో విజయవాడ'ను జయప్రదం చేయండి
నమిత న్యూస్ - Andhra Pradesh / Annamayya : మున్సిపల్ కార్మిక సమస్యలు పరిష్కరించాలి – జూలై 7న 'ఛలో విజయవాడ'ను జయప్రదం చేయండి మదనపల్లి: మున్సిపల్ కార్మికుల సమస్యల పరిష్కారం కోసం జూలై 7న నిర్వహించనున్న "ఛలో విజయవాడ" కార్యక్రమాన్ని విజయవంతం చేయాలని కోరుతూ మదనపల్లి మున్సిపాలిటీలో ఏపీ మున్సిపల్ వర్కర్స్ యూనియన్ (ఏఐటీయూసీ) ఆధ్వర్యంలో కరపత్రాలను విడుదల చేశారు. ఈ సందర్భంగా రాష్ట్ర ఉపాధ్యక్షులు వర్రి సురేష్ కుమార్ మాట్లాడుతూ రాష్ట్రంలో కూటమి ప్రభుత్వం ఏర్పడి రెండేళ్లు పూర్తయినా మున్సిపల్ కార్మికుల సమస్యల పరిష్కారంలో ఎలాంటి పురోగతి లేదని విమర్శించారు. కార్మికులపై పనిభారం పెరిగి అనారోగ్యాల బారిన పడుతున్నారని, ప్రభుత్వానికి, అధికారులకు వినతిపత్రాలు సమర్పించినా ఫలితం లేకపోయిందన్నారు. జూన్ 20 నుంచి రాష్ట్రవ్యాప్తంగా దశలవారీ ఆందోళనలు చేపట్టామని, జూలై 7న విజయవాడలో భారీ స్థాయిలో నిరసన చేపడతామని తెలిపారు. గత ప్రభుత్వాల వరకు పదవీ విరమణ పొందిన లేదా మరణించిన కార్మికుల కుటుంబ సభ్యులకు ఉపాధి కల్పించే ఆనవాయితీ ఉండేదని, ప్రస్తుత ప్రభుత్వం దానికి స్వస్తి పలికిందన్నారు. ఆప్కాస్ నమోదు ప్రక్రియను నిలిపివేసి దానిని రద్దు చేసే ప్రయత్నాలు జరుగుతున్నాయని, దీంతో కార్మికుల పనిభద్రత, వేతనాలు, పీఎఫ్, ఈఎస్ఐ వంటి హక్కులు దెబ్బతింటాయని ఆందోళన వ్యక్తం చేశారు. పట్టణాల విస్తరణకు అనుగుణంగా కార్మికుల నియామకాలు చేపట్టకుండా ఉన్నారని, కరోనా సమయంలో విధుల్లోకి తీసుకున్న డైలీవేజ్ కార్మికులకు ప్రభుత్వం నిర్దేశించిన వేతనాలు కూడా అందడం లేదన్నారు. పర్మినెంట్, కాంట్రాక్ట్, ఔట్సోర్సింగ్ కార్మికులకు గ్రాట్యుటీ అమలు చేయకపోవడం, 12వ పీఆర్సీ ప్రకటించకపోవడం, సంక్షేమ పథకాలు అందించకపోవడం కార్మిక వ్యతిరేక విధానాలకు నిదర్శనమని విమర్శించారు. ప్రభుత్వ రంగ సేవలను ప్రైవేటీకరించే ప్రయత్నాలను విరమించి, మున్సిపల్ కార్మికుల సమస్యలను వెంటనే పరిష్కరించాలని డిమాండ్ చేశారు. సమస్యలు పరిష్కరించకపోతే సమ్మెకు కూడా వెనుకాడబోమని హెచ్చరించారు. అన్నమయ్య జిల్లా ప్రధాన కార్యదర్శి దేవేంద్ర, సీనియర్ నాయకులు మస్తాన్ మాట్లాడుతూ మున్సిపల్ కార్మికులందరూ దశలవారీ ఆందోళనల్లో పాల్గొని జూలై 7న జరిగే "ఛలో విజయవాడ" కార్యక్రమానికి వేలాదిగా తరలిరావాలని పిలుపునిచ్చారు. కార్యక్రమంలో నగర అధ్యక్షులు తిరుమలప్ప, ఇంద్రాణి, అల్లా బక్షు, రాధా, జానకమ్మ, కదిరప్ప, మల్లికార్జున, కమిటీ సభ్యులు తదితరులు పాల్గొన్నారు.
Reporter
Namitha News
మరిన్ని వార్తలు
Developed By :
